Binne die Glashuis

Die binne na buite weerspieëling van my gevoelens, gedagtes en drome oor Gesonde Seks

Kategorie: Gevoelens

Depressie is ‘n Selfsugtige Siekte.

depression goddess

(#2 in die reeks “Ek is ‘n depressie vegter.”)

Lees #1 “Ek is ‘n depressie vegter hier.

Ek het aspris ‘n hele rukkie gewag voordat ek my tweede artikel in my reeks “Ek is ‘n depressie vegter” skryf, want ek wou kyk of ek ‘n depressie “relaps” kry. Tot dusver niks nie. Ek voel great! Was daar ‘n paar “triggers”? Verseker.

Een ding wat jy moet verstaan van depressie is dat dit ‘n selfsugtige siekte is. Dit is ‘n anti-sosiale siekte wat jou gaan oortuig dat jy alleen in die wêreld is. En omdat jy alleen in die wêreld voel, raak jy baie maklik alleen-gesentreerd in jou wêreld en dit is ‘n mooi manier om te sê: jy is ‘n suinige, selfsugtige, mislukke persoon om saam mee te woon.

Die draaipunt het vir my gekom toe Janet in ‘n baie liefdevolle maar eerlike gesprek vir my gesê het dat sy mal is oor my en dat daar nie baie dinge is wat sy aan my sal wil verander nie, behalwe my depressiewe oomblikke. Dit was nie vir haar lekker om ‘n spasie te deel met iemand was soos ‘n emosionele swart gat alle vreugde en geluk insluk rondom my nie.

In die verlede sou ek net my oë gerol het en gedink het, maar sy verstaan nie – ek alleen verstaan my smart en pyn.

En toe tref dit my.

Dit is nie net alleenlik my smart en pyn nie, dit is nie alleen my depressie nie. Wanneer ek in my depressiewe gat val, dan suig ek al die mense wie ek lief het ook in daardie swart gat. Dit was regtig vir die eerste keer daardie dag toe ek besef dat my innerlike depressiewe wereld het ‘n uiterlikke effek op die mense rondom my. WOW!

Ek dog ek was alleen.

Daar het op daardie oomblik, iets in my binneste, kristalhelder geraak:

EK WIL HIERDIE DEPRESSIE BEGIN VEG.

As ek my depressie vir myself kon hou, sou ek alleen daardie las dra (ag siestog ek het myself so baie jammer gekry. Dalk ‘n opvolg artikel.) Maar omdat ek nie my depressie vir myself kon hou nie, wou ek nie meer so ‘n persoon wees nie.

Tot op hierdie stadium het ek geweet ek sukkel met depressie, maar daar was geen begeerte om dit te veg nie. Voordat jy weer sal kan lag en gelukkig wees in jou lewe, sal jy ‘n punt moet bereik waar jy besef hierdie brein siekte is iets wat nie net jou beinvloed nie, maar ook die mense rondom jou.

Daar moet ‘n begeerte om dit te WIL veg gebore word in jou binneste.

Hierdie was die draaipunt in my psige.

Maar ek wil graag dit duidelik maak dat ek nog baie ver was om enige oorwinning oor hierdie siekte te kry, maar iewers in my diepste binne was daar ‘n skakelaar wat aangeskakel was.

Depressie maak nie net die lyer daarvan selfsugtig nie, maar ook die familie en vriende van die depressie lyers. Die mens is ‘n emosionele dom ding, in die sin dat ons net kan voel wat ons voel.

Ons sukkel om te voel wat ander voel. En dan maak ons baie keer die afleiding, maar omdat ek nie so voel nie, behoort jy nie anderste te voel nie.

Hoe baie keer sal die geliefdes van ‘n depressie lyer vir hulle sê: “Ag nee, kyk hoe lekker is dit hier. Kom geniet dit hier saam met ons.”

Moenie selfsugtig wees om depressie af te maak asof dit niks is nie, net omdat jy dit nie voel of verstaan nie.

Depressie is ‘n selfsugtige siekte want dit forseer sy emosies op die mense rondom hom, maar terselfdertyd is dit selfsugtig, wanneer die mense wat dit nie voel nie, dit ontken.

Advertisements

Ek hoef nie die wêreld te verander nie, net myself!

keep-calm-and-change-the-world-72

Ek het nog altyd ‘n gevoel gehad dat ek geroep is vir meer. Meer as ek nou doen. Maak nie saak wat dit is wat ek “nou” doen nie, die diep gewortelde gevoel van meer het my konstant uitgedaag om meer te doen. Die probleem egter was tweevoudig. Eerstens het dit my altyd onvergenoeg laat voel met waar ek tans myself in die lewe bevind. Niks wat ek doen of het was goed genoeg nie. Ek was nie tevrede met enige iets nie. Daar was geen kans om terug te staan en te reflekteer op wat ek bereik het of wie ek is nie. Die dryf tot meer en beter het altyd my aangepor. Dit bring my tot die tweede probleem van hierdie meer-gevoel.

Dat ek maklik uitbrand. (Dit is dalk ook as gevolg van die feit dat ek so ‘hot’ is, maar daar is niks wat ek daaraan kan doen nie.) Besig, besig, besig. As ek stil staan en niks het om te doen nie, dan voel ek soos ‘n mislukking. Soos iemand wat sy talente vat en begrawe.

Ek het darem oor die jare daarin geslaag om hierdie meer-gevoel te kanaliseer tot my werke en nie meer so seer tot versameling van materiële dinge nie. En hier is waar ek weer ‘n groot fout begaan het. Ek het gedink omdat ek nie meer materiële dinge najaag nie, maar eerder my bediening om mense te bedien, huwelike te red en God se koninkryk uit te brei, dat ek veilig is.

Maar dit is nie. Of ek onvergenoegd was met my materiële besitting of met die hoeveelheid van huwelike wie ek red, hoogmoed is steeds die wortel wat diep in my siel gegrond is.

Ek gee jou ‘n voorbeeld.

Elke keer wanneer ek iemand help in berading, waar vorige beraders gefaal het, voel ek nog als great en vertel vir die Here dat Hy maar meer mense na my moet stuur, want ek het duidelik al die antwoorde.

Of nadat ek my een-man stand up comedy “Die Stripshow” doen en terug voering van my gehoor kry dat hulle so lekker gelag het, terwyl hulle oë oor sommige seksuele taboes oopgegaan het, skel ek die Here hoekom Hy my nog nie op die KKNK verhoog gesit het nie. Kyk dan hoe awesome is ek. My awesomeness is ‘n voordeel tot Hom, tot huwelike, tot Gesonde Seks, tot die wêreld. So hoekom is daar dan nie meer van my in die wêreld nie?

En soos wat ek met die Here worstel om vir my meer te gee, aan meer toe te vertrou, my meer te seën, worstel Hy soms terug met my. Een van my gunsteling stories in die Bybel is waar Jakob met die Engel van die Here worstel, want hy soek meer. Vir lank lyk dit asof Jakob die worsteling wen, totdat God besluit om terug te worstel.

POW!!!

KA-POW!!!

BAM!!!

KLAP!!!

En Jakob is uit. Die Here vra hom net een vraag. “Wat is jou naam?”

En dit is hoe God my nog altyd van my voete afgeklap het. Hy draai my fokus weg van die meer-dinge in die lewe wat ek najaag, en hy vra my “wat is my naam?” Hy vra my om binne in myself te kyk. Hy vra my om my hart te ondersoek. Hy vra my of ek weet wie ek is.

En as God vir jou vra wie jy is, dan voel al hierdie hoogmoedige persepsies wat ek van myself het, van “ek is die beste berader”, “die snaakse standup comedian”, “die beste skrywer” net nie meer reg nie. Al wat ek dan, God mee kan antwoord is, my swakhede, my tekortkominge, my vrese, my insecurities.

En wanneer jy so eerlik met jouself kan wees, dan voel dit asof die Here jou klap, soos Saul van die perd, Jakob op die heupbeen, Sagaria op die mond, Moses op lyf en Timothy op sy “meer-gevoel”.

Ek besef nou ek hoef nie die wêreld te verander nie. Ek is nie goed genoeg, groot genoeg, bekwaam genoeg om dit te doen nie. En in die proses om die wêreld te verander gaan ek seëninge in my lewe mis. Die dinge wat jy werklik eers kan raaksien en waardeer, nadat jy eers stilstaan en reflekteer.

Ek hoef nie die wêreld te verander nie, net myself!

Ek hoef nie al die huwelike te red nie, geniet die een wat ek het.

Ek hoef nie ‘n landwye toer te doen met “Die Stripshow” nie, geniet die een wat ek nou doen.

Hierdie neem die “meer-gevoel” wat onvergenoegdheid in my veroorsaak en verander dit tot ‘n tevrede-gevoel wat dankbaarheid in my laat insink.

“Wat sal dit jou tog help as jy alles in die lewe bereik, maar jou diepste menswees ly skade?” – Markus 8:36

I am famous online!

famous onlineVandag het my Gesonde Seks Facebook  blad 60,000 likes oortref. Wow, wie kon raai. Dit voel soos gister toe ek met die blad begin het. Ek kan goed onthou hoe bang ek was dat ek uit idees sou hardloop, ek meen, hoe lank kan ‘n mens nou werklik oor seks praat? Wel, ons vuur nou al die liefdesvlamme aan  vanaf 2011 en ek leer nog elke dag iets nuuts oor seks.

Ek het gewonder hoeveel mense die blad sal wil “join”, aangesien ons mos nie uit die slaapkamer mag praat nie.

Dit het my ‘n jaar gevat om die “10,000 likes” merk te bereik en glo my, julle het my 24/7 besig gehou. Daardie eerste jaar was verseker rof. Maar na die 10,000 merk het die blad eweskielik ontplof en het ek ook ‘n bietjie FB slimmer geword . Ek moes onder andere sisteme in plek sit om die groeiende massa Gesonde Seks Facebook aanhangers beter te hanteer. Nou groei ons met so net onder ‘n 1000 likes per week.

Sex sells! Ja, maar nie Gesonde Seks nie.

Daar is miljoene mense wat na seks kyk en vir seks betaal op die internet, maar daar is weinig min wat bereid is om oop te maak oor hulle eie seks lewens. Gesonde Seks is ‘n moeilike “sell”.

Ons het oor die jare meer as 10 000 mense van ons blad af verbied, juis om dit gesond en skoon te hou.

Die ander ding wat by my bly, van die begin dae van Gesonde Seks af,  is die verskriklike teenstand wat ek, nie net op ‘n daaglikse basis, maar ook op ‘n “post-basis” ontvang het. Ek het gereeld gedreig om die blad te sluit en net aan te gaan met my lewe. Maar my vrou het my bemoedig en daar was ‘n stil stem in my gees wat my aangehits het.

4 jaar later het ons een van die grootste en aktiefste Afrikaanse Facebook blaaie op die net.

Ek kry minder sulke teenkanting vandag as in die begin dae. Ek dink nie dit is omdat ek “makker” geword het met my posts nie, maar omdat ek so baie van julle het, wat agter my staan en vir my  posts “rally”. Ek kry die persoon jammer wat op Gesonde Seks iets negatief oor seks of iets oor my sê. “Don’t touch me on my studio” kom nou by my op.

So elke nou en dan wanneer ek bediening doen buite die “veiligheid” van die Gesonde Seks Facebook blad, of wanneer ek ‘n Facebook advertensie plaas vir mense wie nog nie deel is van Gesonde Seks nie, dan besef ek weer hoekom ek Gesonde Seks in die eerste plek begin het. Want die algemene siening rondom seks, beide binne en buite die kerk is nié gesond nie. Dit is óf te vulgêr óf te preuts. Daar is nie veel Gesonde Seks balans nie.

Ek weet ek is geroep om te doen wat ek doen en ek sal aanhou om dit te doen vir solank ek dit geniet en dit gesond is vir my en my gesin.

Hier is tot die volgende 60,000 likes.

God seën en Gesonde Seks

Timothy Kieswetter

2014 in die Glashuis

media_47454_en2014 was ʼn snaakse jaar. Nie omdat ek met my stand-up comedy show begin het nie, maar meer in die lewensbeginsels wat ek geleer het. Ek het geleer dat daar humor is in pyn en seer. Maar ons kan slegs daardie humor raak sien, wanneer ons ophou onsself jammer kry. Solank soos wat ons die pyn en seer styf vas hou, sal daar geen lig aan die einde van die tonnel wees nie.

Ja, die meeste van die pyn en seer wat oor ons pad kom het ons nie voor gevra nie, of is eens ons skuld nie. Dit was sonder permissie op ons af geboelie. En as ons daardie pyn en seer gaan toelaat om in ons harte te bly, verander ons in die emosionele boelie wat onsself onderhou.

Lig jou kop op.

Dit is nie die einde van die wêreld nie.

Die Mayans was verkeerd, ons almal lewe nog. (Dis seker die laaste jaar wat ek daai grappie kan maak.)

Jou pyn en seer gaan jou altyd laat voel dat JY die belangrikste persoon in die wêreld is.

Dis dalk hoekom ons almal ander mense ook so seer kan maak, want ons glo (vanuit ons eie pyn en seer dat EK die belangrikste persoon is.)

Daar is verligting in die besefwording dat EK nie die belangrikste persoon is nie. En sodra ek dit besef raak my pyn en seer nie meer my kruis om te dra nie, want ek sien dat elke mens op die aarde loop met ʼn kruis op hulle rug.

As jy die vermoë kan ontwikkel om vir jouself te kan begin lag en toelaat dat jou pyn en seer jou hart nie verbitter nie, dan, moontlik, sal die vreugde van die Here weer vir jou krag gee.

ʼn Ander snaakse ding wat ek hierdie jaar geleer het, is dat as God ʼn God is wat deure oopmaak, moet Hy tog ook ʼn God wees wat deure toemaak. Of glo ons dat God in ʼn grot gebore was? Maar dit is tog wat ons glo. God sal net goeie dinge oor my lewe bring en al die teenstand wat ek kry is van die duiwel af. Nie waar nie? Soms sê die Here ook nee, vir geen rede wat ons ooit sal kan verstaan nie. En om daarteen te skop en skreeu, los jou net moeg en hees. Daarom het ek hierdie jaar oorgegee aan die God wat deure oopmaak asook toe slaan in jou gesig.

Ek het ook geleer die belangrikheid om dinge te hoor wat jy nie wil hoor of hou van om te hoor nie. Moenie wegskram van sulke ongemak nie. Sit en leer.

Die volgende 2014 openbaring is dalk nie heeltemal ʼn nuwe openbaring vir my nie. Ek was al vir baie lank bewus van die feit dat wat ek doen as ʼn Bybel en Seksualiteitskenner sommige mense omkrap. Maar blykbaar het ek hierdie jaar te ver gegaan. Was dit die pink stilletos of was dit die blou-ballas? Ek weet nie. Ek het geleer dat daar mense is (3 is ‘mense’, 2 is ‘hulle’ en 1 is jou skoonma!) wie dit hulle absolute lewenstaak gemaak het om my loopbaan en reputasie te vernietig. (Ek moet bieg. My skoonma is awesome. En ek sê dit nie net omdat ek weet sy my blog lees nie, ek bedoel dit regtig.)

Ek weet ons land het ʼn te kort aan werk en ek is absoluut vir werkskepping, maar regtig. Anti-Timothy lui net nie lekker op jou besigheidskaartjie nie. Wat gaan gebeur as ek oorsee genooi word om daar my show te gaan doen. Word daai mense dan Internasionale Anti-Timothy’s?

Ek gaan toe na die Here toe met hierdie bedroefdheid in my om vir advies te vra, hoe het Hy sulke Anti-Christene gehanteer? Hy het my dadelik geantwoord.

“Ek het gesterf.”

En so moet ek en jy ook maak elke keer in onsself sterf en ons ego’s en reputasies neerlê, want ongelukkig is daar net te veel mense op die aarde en statisties sal daar wel ʼn presentasie van mense wees wat Anti-jy is.

Nee wat, ek het hierdie jaar besef dis ʼn mors van tyd om jou reputasie te beskerm, want mense gaan in elk geval hulle eie afleidings maak van jou. Ek spandeer eerder my energie om vir die mense wie naby genoeg aan my is en wie my wil leer ken, om vir hulle my karakter te wys.

En laaste, maar seker vir my die mees diepgaande openbaring wat ek in 2014 geleer het, is die belangrikheid om vir ander mense hulle waardigheid te gee. ‘Dignity’, is wanneer ons die mooi in mense raak sien en tot dit spreek en nie afgesit word of hulle afskryf oor ʼn swak keuse of ongewenste uitkoms nie. Want is ons nie tog almal in God se beeld geskape nie? Gaan soek lank genoeg, grou diep genoeg en jy sal hulle goddelike “spark” vind. ‘Dignity’n is hoe jy teenoor daardie “spark” optree, en dit in die persoon uitroep.

En as jy lank genoeg gewag het en jy vind absoluut geen goddelike “spark” in die persoon nie, dryf die demoon uit en soek van vooraf.

Vind die humor in jou tragedie.

Aanvaar wanneer God ʼn deur in jou gesig toe slaan.

Gaan rustig op daai reputasie van jou, werk eerder aan jou karakter.

En bowenal, behandel mekaar met waardigheid.

Geseënde Nuwejaar vir julle almal.

My pa die snaakste predikant en ek die prekerigste komediant.

AppleTreeLg

Die appel val nie ver van die boom nie. Wat seker nie ʼn slegte ding is as jy ʼn appel is nie, maar as jy ʼn ambisieuse testosteroon gedrewe jong seun is dan is daar ʼn seker rebellie wat in jou binneste groei omdat jy jouself in die skaduwee van jou pa se Appelboom vind.

My pa is verseker een van die beste aardse pa’s wat jy kry en ons het ʼn nog altyd ‘n baie goeie verhouding gehad. Daar was net een probleem volgens my. My pa was net tè bekend. Die van julle wat nie my pa, Gary Kieswetter ken nie, hy is ʼn rondreisende predikant en maak nie saak waar ek sou gaan in Suid-Afrika nie, sou almal my Gary Jnr. noem.

Ek moet bieg dat daar baie voordele is om ʼn bekende pa te hê. Maar vir hierdie jong seun wat sy eie merk op die samelewing wou maak, was die kerk-wêreld net te klein vir twee Kieswetter’s. So toe ek my loopbaan in seksuologie begin toe begin ek voel hoe hierdie appel al hoe verder van die Appelboom wegrol. My identiteit as individu was nog nooit so sterk nie, maar so ook my stresvlakke, want ek rus nie meer in my pa se bekende skaduwee nie.

Ek voel hierdie appel het vol sirkel gekom die naweek van 2-3 Augustus 2014.

Soos baie van julle weet en 750 van julle my gesien het, was ek die 2de Augustus met my een-man standup comedy show “Die Stripshow” in die Kaap gewees. Daar was baie dinge van daardie aand wat vir my uitgestaan het, maar niks so veel soos my pa wat in die voorste ry van die gehoor gesit het nie. (Die 10 rye agter hom 250 van sy gemeentelede.)

Ek begin toe my show om te noem dat alles wat ek die aand op die verhoog gaan “strip” is alles my pa se skuld. Hoekom? Want hy is só bekend dat ek ʼn male-stripper moes geword het om uit sy skaduwee te kom. (Ek is seker my pa is baie dankbaar ek het nie besluit om ʼn female-stripper te word nie.)

Die show het fantasties goed gegaan. Ek het so goed gevoel, want nie net het ek my pa se goedkeuring en ondersteuning vir my “stripping” nie, maar ook het ek vir die eerste keer in my lewe my eie Appelboom gegroei. Ek het my eie identiteit gevind en besig om my merk op die wêreld te maak. As iemand sou vra wat doen ek, kan ek met totale uniekheid antwoord: “Ek was eers ʼn jeug-pastoor en toe gaan studeer ek seksuologie en nou is ek ʼn standup komediant.”

Die aand was ʼn sukses. Nie net het die mense vir my grappies gelag nie, maar hulle het ook my boodskap ingeneem.

Die volgende oggend gaan ek saam na my pa se gemeente in die Kaap “Die Bron.” (Die van julle wat ʼn gemeente in die Kaap soek, ek kan my pa se gemeente aanbeveel, want hulle ondersteun “Stripshows.” Verseker net myne, maar nogsteeds. Facebook Die Bron)

Daar sit ek in die kerk, baie tjuff met myself en luister na my pa se preek en besef wat ek nog al die jare geweet het. My pa is die snaakste predikant. Ek het nog altyd gewonder hoekom hy nie in comedy in gaan nie, want die mense in die kerk huil soos hulle lag. (Natuurlik eers nadat hulle gekyk het of die dominee ook lag.)

My verhoogbestuur wat langs my gesit het in die kerk voordat sy weer Pretoria toe sou vlieg, stamp my in die ribbes en sê: “Ek kan sien waar jy jou sin van humor gekry het. Jou pa is vrek snaaks.”

Maar inplaas daarvan om weer daardie rebellie in my binneste te voel om uit my pa se skaduwee te beweeg en my eie ding te doen, het ek ʼn trots en dankbaarheid dat ek wel die voorreg het om my sin van humor van my pa te kry. (Nie almal het pa’s om dinge van te kry nie, en ek vir een is ʼn baie dankbare appel.)

Ek het vol sirkel beweeg net om te besef dat ek nie so anderste is soos ek probeer het om te wees nie. En weet jy wat? Dank die Here daarvoor.

Maak seker jy woon my volgende show in Pretoria by die 3de Oktober by die Centurion Teater. Hierdie sal my laaste show vir die jaar in SA wees. Ek doen die einde van Oktober 3 aande in Namibië by die Nasionale teater van Namibië in Windhoek.

Kaartjies vir albei by Computicket beskikbaar.

 

 

 

Is pinkhoëhakke en bloubul-balls ‘n teken van ligsinnigheid?

Stripshow poster

Die laaste week het so paar mense my gekritiseer (asook verse gekwoteer) oor my verhoogproduksie, “Die Stripshow” dat ek ligsinnig is en alle goed wat ek oor die jare opgebou het net weer afbreek.
Ek het toe ‘n bietjie gaan oplees oor hierdie ligsinnigheid. Die Engels vertaal dit as foolishness wat beteken om morally reckless te wees in die oorspronklike Hebreeus.

As ligsinnigheid beteken om morally reckless te wees, dan dink ek dit sal moreel onverantwoordelik van my en van ons almal wees om NIE oor seksuele taboes te praat nie. Vir te lank (eeue en eeue) is ons gevangene van hierdie taboes en mites wat soos ‘n swaar las op ons gewetes hang.

“Timothy, maar hoekom moet jy die seksuele taboes weg-strip in pink hoëhakskoene en met bloubul-balls?”

Goeie vraag.

Want ek voel hierdie is SO ‘n belangrike onderwerp om oor te praat en as ek nie ALLES in my vermoë doen om so veel as moontlik mense te lok nie, sal ek moreel onverantwoordelik wees, om nie hierdie boodskap van Gesonde Seks na so veel as moontlik mense te neem nie.

So nou het ek ‘n vraag terug aan my kritiseerders.

“Sal ek meer of minder mense na my shows toe lok met pink hoëhakskoene en bloubul-balls of sonder?”
Natuurlik, dit maak mense nuuskierig en dus sal hierdie Gesonde Seks boodskap meer mense bereik.
Daarom sal ek meer moreel onverantwoordelik wees om NIE met pink hoëhakskoene en bloubul-balls die show te doen nie.
Ligsinnigheid het dus niks te doen met humor of slap-stick humor nie. (Of in hierdie geval slap-dick)

Eerder het ligsinnigheid te doen om nie oor die heavy issues in die lewe te praat nie (aka die taboes).

Om die klein onbelangrike dinge in die lewe so heavy te maak, nou dis vir my ligsinnig.

Soms wil ons met humor na die “heavies” in die lewe kyk en nie ernstig op die “light stuff” nie.

Maar die van julle wat bekommerd is dat my show ‘n bietjie skurf gaan wees. Julle hoef glad nie te bekommer nie, want met Gesonde Seks maak ons seker daar is genoeg lubrikasie betrokke.

Ek wou nog altyd grappies vertel

jokes

 

Ek het nog altyd grappies op skool vertel, nie omdat ek geniet het om die klas nar te wees nie, maar omdat ek uitgevind het dat as ek die Mickey uit myself sal uithaal, voordat die boelies dit doen, is dit minder pynvol en vernederend.

So ek het die Mickey, Minnie en Donald Duck uit myself uitgehaal net as ʼn verdedigende meganisme om nie geboelie te word nie. (Dit het seker nie gehelp dat ek groot ore gehad het soos Mickey en dat ek soos Donald Duck kon praat nie. – Dit is eers in later jare dat ek pink stilettos soos Minnie Mouse aantrek!)

Janet het my gevra toe ek begin het my die een-man-verhoogproduksie, hoekom wil ek dit doen? Sekerlik gaan mense weer vir my lag en dink ek is laf.

Ek doen dit darem nie meer alleenlik om weg te kom van boelies nie, maar om mense te help om weg te kom van die boelies in hulle eie lewens.

In Suid-Afrika, veral onder die Christen Afrikaner is daar so baie individue en huwelike wat onder die geweldige las van seksuele taboes en mites moet suffer.

Dit steel hulle geluk, hulle seksuele lus, hulle verliefdheid vir mekaar en bo alles dit steel hulle hoop, hoop vir ʼn perfekte huwelik. (Dalk is ʼn perfekte huwelik ook maar net ʼn mite?!?)

Totdat ons nie die taboes en die mites weg strip uit ons lewe en huwelike nie, sal ons nie in vryheid in mekaar se teenwoordigheid kan floreer nie. Soos Genesis 2:25 vir ons leer, “En die man en sy vrou het albei naak voor mekaar gestaan en nie skaam gevoel nie.”

Daar is geen taboe of mite in hierdie huwelik nie nie. Geen geheime of weggesteekte begeertes nie.

Naak.

Ontbloot.

Kwesbaar.

Jy.

 

En jou maat ontvang hierdie naak, ontblote, kwesbare jy met onvoorwaardelike liefde.

Geen skuldgevoelens.

Geen oordeel.

Geen sleg sê.

Geen skaamgevoelens.

 

Maar min huwelike lyk soos Genesis 2:25 s’n.

Hoekom?

Seksuele taboes en mites!

Dit steel, moor en verwoes.

 

En omdat hierdie seksuele taboes en mites so ʼn swaar negatiewe las is, maak dit mens te depressief om ernstig daaroor te wil praat.

Daarom “Die stripshow”

Daarom die verhoogproduksie

Daarom ek wat grappies maak voordat die boelies enige meer skade verrig.

 

As jy in die Pretoria area woon, kom kyk gerus na my een-man-verhoogproduksie “Die Stripshow” waar ek al die seksuele taboes gaan weg strip totdat ons weer naak voor mekaar kan staan. (wel, figuurlik!)

Kaartjies te koop by Computicket

Computicket logo swart

My vyande kan maar gaan vlieg.

button_enemies

Daar is seker niemand ouer as 16jaar wat nie weet hoe dit voel om ʼn mes in hulle rug gesteek te hê nie. Die pyn, seer en hartskrampe wat veroorsaak word deur die mense wie jy naby jou toe laat, wie jy vertrou en na op kyk, lief het en respekteer, wat vir geen verklaarbare logiese rede op jou draai en jou so seer maak, so kul, so bedrieg en so ʼn deel van jou naïewe mense nog so bietjie meer doodmaak.

Ek het onlangs deur so ʼn “Et tu Brute” oomblik gegaan. Ek sal graag hier vir jou wou skryf alles is nou weer reg en ons sing almal nou weer saam Kumbaya. (Maar ek sing glad nie, nie eers as ek happy is nie.) Maar ek het so paar dinge hier in geleer. (Dit is een van my lewens motto’s, leer wat ek kan waar ek kan. Hierdie filosofie het egter eers na hoërskool in geskop.)

Van die begin af het ek geweet ek is nie lus om terug te baklei nie. (Nog nooit enige iets goeds was al deur terug bakleiery verkry nie.) So ek het deur ʼn innerlike reis gegaan om deur my emosies te werk.

Omdat ek ʼn Christen is, is my default om God orals te wil in bring, maar ongelukkig is my vyande ook Christene en hulle het ook God in gebring. (Go figure!)

Nou kom die skrif die hele tyd by my op van Matteus 5:43-44

“Julle het gehoor dat gesê is: ‘Jy moet jou eie mense liefhê, maar jy hoef nie jou vyand lief te hê nie.’ Maar Ek sê vir julle, julle moet julle vyande liefhê en bid vir diè wat julle vervolg.”

My goeie vriend het my uitgedaag om elke dag vir hierdie spesifieke persone te bid en te seën.

Ek vertel hom toe dit is nie ʼn probleem nie, ek bid elke dag vir hulle dat hulle die error in hulle ways sal sien. Ek bid dat hulle tot bekering sal kom. Ek bid dat hulle tot inkeer sal kom. Ek bid dat hulle sal sien hoe belangrik ek is.

Hoe maklik is dit nie om dinge oor ons te maak nie?

Die rede hiervoor is omdat emosies is soos die zoom in knoppie op ʼn kamera. Die emosies gaan jou insluk dat al wat jy kan sien en voel is die intense pyn wat hulle aan JOU gedoen het. En dan wanneer jy selfs God inbring, al waaroor jy kan bid, preek, spreek, lees, beleef is jouself. Maar hierdie is self vernietigend wat die lewe gaan nie regtig oor ons nie, ons is nie so belangrik nie, en dit is wat Jesus in sy teaching vir ons probeer uitwys.

As jy vervolg word, moenie dit oor jou, maak nie, bid vir hulle.

En dit is nie die tipe gebed wat ek aan die begin gebid het nie. Want daardie gebed is nie eintlik enige iets naby aan die seën gebede wat God van ons verwag om te doen nie. Dit is selfsugtige gebede, waar ons God aan ons kant maak. Daarom kan twee Christen baie hard en lank met mekaar verg en al twee voel hulle het God aan hulle kant.

Ek dink God se antwoord vandag is steeds dieselfde as wat hy vir Josua geantwoord het in Josua 5:13-14

“Josua was in die omgewing van Jerigo toe hy skielik ʼn man voor hom sien staan met ʼn swaard in sy hand. Josua het na hom toe gegaan en vir hom gevra: “Is jy ons vriend of ons vyand?”

“Nie een nie.” antwoord die Man.

Ons moet versigtig wees om die Here in te sleep in ons gevegte. Hy gaan nie kant kies nie. Hy is bo dit. Hy is lief vir almal en genadig vir ons vyande ook.

God wil hê ons moet ophou die zoom in knoppie druk op ons pyn en seer, want al wat dit ons maak is bitter, selfsentrerend, selfsugtig en oortuig God is net vir my.

Om genees te word, om gesonde te wees, om ʼn lewe van oorvloed te geniet moet ons konstant die zoom uit knoppie druk, sodat ons perspektief kan kry. En sodra ons sien dit gaan nie oor ons nie, ek is nie die belangrikste nie, dan weer ons waarlik het ons begin om perspektief te kry.

En Matteus 5:44 verduidelik vir ons hoe om uit te zoom.

Seën bid vir die wat jou vervolg.

“Here seën hulle.” Is nie goed genoeg nie. Want jou hart sal hulle graag wil seën met aambeie.

Spesifieke seën gebede.

“Here, seën hulle in hul besigheid.”

“Seën hulle met genoeg kliënte.”

“Seën hulle sodat hulle kliënte op tyd sal betaal.”

“Seën hulle sodat hulle ʼn verskil sal maak in die werk wat hulle doen.”

 

Nou om hierdie seën gebede te uiter was moeilik en het my lank geneem om dit hardop te bid. Maar hoe meer ek dit gedoen het, hoe meer het ek ʼn verskil begin agter kom. Nie die verskil wat EK graag sou wou gesien het, waar my vyande nou weer my vriende geword het. Nee, want dit gaan nie oor my nie.

Ek kon die verskil sien wat ek glo God in my wou sien. Volwassenheid.

Eweskielik kom ek agter maar hulle doen eintlik baie goeie werk, hierdie vyande van my. Hulle help mense met allerhande seksuele probleme. Hulle versterk huwelike. Hulle doen almal goeie gesonde seks werk.

Dit is nie net meer net ek wat die Gesonde Seks boodskap moet dra nie.

Eweskielik is die fokus nie, meer op myself nie, my Facebook blad nie, my Gesonde Seks, my kliënte, my inkomste, my reputasie, my eer, my seer, my pyn.

Nee, die zoom uit knoppie het perspektief gebring, dit gaan oor mense.

Mense wie van jou hou, maar ook mense wie nie van jou hou nie.

Mense wie jou lief het, maar ook mense wie jou haat.

Mense wie jou sal help, maar ook mense wie jou sal teëwerk.

Mense wie soos jy glo, maar ook mense wie glo jy is die duiwel.

Mense, al shape and sizes. Mense.

En in dit, begin ek weer God se hart sien.

Sy liefde vir mense.

Sy liefde vir my en jou.

Sy genade vir wie in Hom glo, maar ook vir die wat in Hom twyfel.

Mense.

Mense.

Mense.

Nie meer net, EK EK EK EK EK, nie.

Nee,

Mense.

Mense.

Mense.

Liefde vir mense.

Ek begin nou eers verstaan hoekom Jesus kon sê die heel belangrikste van al die wette en wat al die wette van oud vas hou aan mekaar is ons liefde vir mekaar.

Liefde is nie net ʼn warm gevoel wat jy het teenoor iemand anderste het nie, dit is die groter “zoom uit” perspektief prentjie wat ons het van mense, dat ons hulle seënwense toe bid. Dat dit mag goed gaan met hulle.

Mense dit gaan oor mense!

En as jy getroud is en jy baklei meer gereed as wat dit vir julle gesond is, soek vir daardie zoom uit knoppie. Moenie langer toe laat dat jou eie seer en pyn, jou insluk nie. Zoom uit. Kry perspektief. Bid vir jou man of vrou. Nie om te verander nie. Of om met jou te kom reg maak nie. Nee, seën gebed. Gebede van voorspoed en eweskielik gaan jy ʼn verandering sien. Nie in die persoon vir wie jy bid nie, maar in jouself.

En dit is wat ek glo waar die krag van gebed in lê, om ons te verander om in die wêreld om ons in te pas, in plaas van om te bid om die wêreld te verander om by ons aan te pas nie.

 

 

 

Dit is reg om oog vir ʼn oog te ruil, maar dit is meer reg om die ander wang te draai.

ethics

Ek is besig om die finale werk te doen aan my navorsing oor die Afrikaanssprekende Christen se seksualiteit en het al begin dagdroom oor wat ek graag sal wil doen vir my doktorsgraad. Ek speel rond met die idee om te skryf oor seksuele etiek. (As ek so na mense kyk, sal iemand anderste asb. iets skryf oor Christelike etiek, want die kinders van Jesus doen nie soos Jesus nie.)

Daar is nou ʼn groep mense wat, nie baie van my hou nie. Wel dis regtig nie iets nuuts nie, daar was al van my St1 insident met die grootste en bevreesde persoon in die skool, mense wat nie van my gehou het nie. (Haar naam was Lee-Ann, ek wonder wat het van haar ooit geword?)

Maar hier is nou ʼn nuwe groep. ʼn Groep wat nie regtig ʼn probleem met my het nie, maar met waar ek studeer. (Politiek) Wat baie ironies is, is dat juis hierdie mense in die mediese veld en sielkundige veld wat nou ʼn probleem met my het, was so gaaf om woorde van lof te skryf vir my twee boeke oor seksualiteit.

Hierdie elitegroep wat seksuologie nou vir hulleself wil hou, (by the way, seksuologie as beroep bestaan nog nie in Suid Afrika nie asook is daar nie een beheerliggaam of raad wat die beroep verteenwoordig nie. Daar is nou ʼn paar rade in SA wat almal baie hard fight om te wen om koning te kraai van die seks-hoop. Nog niemand het gehoor van saam werk nie. Dit moet iets in ons Afrikaner DNA wees of iets, want saam werk is iets wat ons nog nooit kon saam doen nie. En om saam iemand te werk wat soos jy dink is nie regtig die saamwerk wat ek na verwys nie.)

So loop die aantuiging teen my, omrede ek nie ʼn mediese dokter is of ʼn kliniese sielkundige is, weet ek niks van seksualiteit nie, of kan my advies nie getrust word nie, al het hulle baie mooi woorde van lof vir my boeke oor seksualiteit geskryf.

Net vir die rekord het ek nog nooit myself uit gemaak as ʼn mediese dokter of as ʼn sielkundige nie.

Ek is ʼn Bybel en Seksualiteitskenner wat besig is om my meesters graad te studeer by die Akademie van Seksuologie SA.  (Waarmee hierdie elitegroep ʼn probleem mee het.)

Wat dinge verder ironies maak is dat hierdie elitegroep deel is van PRESIES dieselfde internasionale seksuologie rade en in dieselfde internasionale seksuologie wetenskaplike joernale gepubliseer is as die Akademie van Seksuologie SA.

 

So omdat my gedagtes alreeds rondom etiek draai, het ek gewonder watse etiek is hier te vinde om my optrede te begelei?

#1 My Christelike geloof gee my die reg om ʼn beer uit die woud te roep om my vyande te verslind.

(2 Konings 2:23-24)

“Elisa het daarna na Bet-El toe opgegaan. Terwyl hy in die pad loop, kom ʼn groep klein seuntjies uit die dorp en begin hom spot. “Gaan op, kaalkop!” het hulle uitgeroep. “Gaan op, kaalkop!” Elisa het omgedraai, na hulle gekyk en hulle in die Naam van die Here vervloek. Toe kom daar twee bere uit die bos en verskeur 42 van hulle.”

Gelukkig is ek nie kaalkop nie. Ek skeur net my hare baie kort. Maar as ek Nataniel weer sien sal ek hierdie vers vir hom gee.

#2 My Bybel gee my ook die reg om ʼn oog vir ʼn oog en ʼn tand vir ʼn tand te verruil.  

(Eksodus 21:24-25)

“’n Oog wat beseer is, moet met ʼn oog se skade vergoed word. As ʼn tand verloor is, moet iemand se eie tand uitgeslaan word. ʼn Hand se skade moet met ʼn hand vergoed word, ʼn voet vir ʼn voet, ʼn brandplek vir ʼn brandplek, ʼn wond vir ʼn wond en ʼn kneusplek vir ʼn kneusplek.”

Te danke aan my admirasie vir Rob Bell, lees ek al sy boek en daarin verduidelik hy hierdie vers oor ʼn oog vir ʼn oog en ʼn tand vir ʼn tand is nie so barbaries soos dit vandag klink nie. Hy verduidelik dat voordat hierdie reël neer gelê was, was dit ʼn free for all. As iemand jou kar gestamp het, kon jy sy kar vat, of as iemand te lank na jou vrou kyk kon jy sy vrou vir jouself neem. Daar was geen reël of etiek wat die ‘reg’ van ʼn optrede bepaal het nie. Elke ou kon net doen wat hy wou. En daarom is etiek belangrik, sodat ons nie almal doen wat ons wil nie, want dan is daar ʼn kans dat daar baie meer bere is wat rondloop en mense verslind.

Nee, hierdie reël in Eksodus was cutting edge vir sy tyd gewees. Dit het ʼn nuwe etiek onder die mense in gebring dat as iemand teenoor jou oortree, moet jy in ʼn gelyke mate reageer.

Om ʼn beer uit die woud te roep is reg, maar dit is meer reg om net hulle terug te spot.

So in my situasie het ek reg om ook stories aan te dra en hulle kennis oor seksualiteit te bevraagteken. Maar is dit die meeste reg om dit te doen?

Is dit waar ons etiek vas gehak het, by ʼn oog vir ʼn oog en ʼn tand vir ʼn tand?

Nee, Jesus het gekom en ons etiek na nog ʼn nuwe vlak geneem.

#3 Draai die ander wang.

Matteus 5:38-40

“Julle het gehoor dat daar gesê is: “’n Oog vir ʼn oog en ʼn tand vir ʼn tand.’ Maar ek sê vir julle, julle moet julle nie teen ʼn slegte mens verset nie. As mense jou op jou regterwang klap, draai vir hulle ook jou ander wang. En gee vir hulle wat jou hof toe wil vat omdat hulle jou onderkleed wil hê, ook jou bo-kleed.”

Sjoe dis, moeilik.

Kan ek nie maar eerder ʼn beer roep nie?

My linkerwang is my beste kant!

Ek het nie ʼn probleem om my onderkleed of bo-kleed uit te trek nie. Ek is so bietjie van ʼn nudis in my binneste!

Maar hierdie elitegroep het voordat hulle met hierdie veldtog teen my begin het, ʼn afspraak met my gehad om my ʼn ultimatum te stel. As ek al my Gesonde Seks Facebook mense en kliënte na hulle toe verwys sal hulle my uitlos, en vir almal sê moenie oor Timothy worry nie, hy doen goeie werk op Facebook, want hy stuur al sy kliënte vir ons.

As die persoon my net mooi gevra het, sonder om my deur die gesig te klap, sou ek met liefde al my mediese en kliniese kliënte daarheen verwys. Ek het nie ʼn probleem om te deel nie. Maar dit was nie goed genoeg nie, vind ek nou uit, want twee maande later, vertel hulle almal wat al ooit saam met my gewerk het, hoe swak my opleiding is.

So hulle het gevra vir my Gesonde Seks Facebook blad, en ek het vir hulle gesê ek verwys graag, maar eers moet hulle my ophou klap. (Dit was nie ʼn baie aangename ervaring nie.)

Ek moet hier by noem dat ek anderste geleer is, as die elitegroep. Dat nie alle seksuele probleme is medies of sielkundig nie. Seksualiteit is deel van alles wat daardie persoon opmaak. Jy kan nie dit wil kompartementaliseer nie.

Die meerderheid mense wat by my eindig het nie mediese of sielkundige of teologiese probleme nie. Vir dit gaan hulle (ek neem aan) dadelik na hulle dokter, sielkundige of pastoor toe. Die mense wat by my op eindig is mense wat sukkel om Gesonde Seks in hulle lewens te geniet. So noem my dan maar ʼn life coach. (Wat ook nog ʼn beroep is in SA wat nie gereguleer is deur een groep nog nie, so ek is diep in die middel van politiek.)

Selfs toe ek nog gewone preke gedoen het, het ek nie regtig iewers ingepas nie. Ek het by ʼn klein Engelse Bybelskool studeer. Ek was ʼn jeugpastoor in die AGS kerk. Ek het interkerklik vir jare daarna bedien in NG Kerk, Gereformeerde kerk, PPK, APK (Kan jy glo!) en selfs by die Sewendedagadventis gemeentes. (Ek het daardie Saterdag oopgehad!)

Ek verstaan dat ek nog nooit iewers in gepas het nie, maar nog altyd uitgestaan het. En ek kan nie regtig sien hoe dit in die toekoms gaan verander nie.

So kom ons kyk wat die etiek ons geleer het.

Dit is REG om ʼn beer uit die woud te roep as iemand my spot, maar dit is MEER reg om my vinger in iemand se oog te steek, maar dit is die MEESTE reg om die ander wang te draai.

Dit is REG om ʼn prokureur te roep as iemand my sleg sê, maar dit is MEER reg om net so stink brief oor hulle publiek te maak, maar dit is die MEESTE reg om al die mediese en kliniese kliënte na hulle te verwys.

(Ek is baie jammer aan al die prokureurs wat hierdie lees, ek het nie bedoel om julle met bere te vergelyk nie! – Moenie my sue nie!)

 

So net om dinge duidelik te maak. Ek gaan aan hou om Gesonde Seks te doen. Nie as ʼn mediese dokter nie, (want ek is dit nie) of as ʼn sielkundige nie, (want dit is ek ook nie), maar as iemand wat so ietsie van seksualiteit weet. ʼn Deel daarvan het ek geleer deur om elke dag honderde anonieme vrae oor Gesonde Seks te lees en die res het ek geleer by die Akademie van Seksuologie van SA, (al is daar baie mense wat nie van die Akademie hou nie.) Ek het darem daardie mense se woorde van lof op my boeke.

 

 

 

 

 

Jammer ek het so baie mense mislei

mislei

Ons almal het al dinge gedoen waaroor ons nie trots is nie en as ons die kans gegun word, sou ons spring om dit anderste oor te doen.

Ek het al van ‘n jong ouderdom meer belang gestel om te lei as om te volg. Ek het die ander dag my kleuterskool verslag in ‘n boks ontdek. Dit het gesê, “Timothy geniet dit om speletjies uit te dink en vir sy vriende te vertel hoe hulle dit moet speel.”

Saam met hierdie leierskap posisie (al was dit ‘n selfaangestelde posisie) het daar ook baie verantwoordelikheid mee saam gekom. Ek was deur my kleuterskooljare, laerskool en hoërskooljare baie bewus van die verantwoordelikheid. Dit het swaar op my skouers gerus. En ek het dit baie ernstig opgeneem. Hierdie swaar las om die (selfaangestelde) leier te wees van almal rondom my het ‘n baie diep identiteit in my gevorm.

Dit was my Godgegewe (nie meer selfaangestelde posisie nie) plig om die mense rondom my in die waarheid in te lei.

Elke aksie, optrede en gesprek wat ek gehad het was gemotiveer deur hierdie God-gegewe verantwoordelikheid om mense te lei.

Ek onthou een van die vroegste gevalle waar dit my verantwoordelikheid was om geregtigheid te laat skiet. Ek was in St5 en voor my het een van my vriende gesit, Johan Fourie. Soos kinders maar is het Johan baie kinderagtig opgetree, wat my baie geïrriteer het. Hy het terug geleen op sy stoel en my tafel gestamp. Hierdie het ‘n snaakse speletjie geword vir hom, want hy kon sien hoe dit my vreeslik gepla het. Die stampe het al hoe harder en meer gereeld geword, soveel so dat my penneblikkie van die tafel af geval het en die inhoud daarvan het oor hele klaskamervloer geskiet. Op daardie oomblik skop ek sy stoel so hard dat hy langs die meisie voor hom inskuif.

Natuurlik net op daardie oomblik sal die juffrou haar kop optel en sien wat ek gedoen het. Maak nie saak hoe ek probeer verduidelik dat Johan alles begin het nie, was ek uit gevang en gestraf. Hierdie duidelike onreg het my bloed so laat kook en ek was seker die Here was netso omgekrap oor die onregverdigheid van wat gebeur het, dat ek met soveel oortuiging in my hart vir Johan gesê: “Jesus, maak hom dood.”

My verantwoordelikheidsgevoel om geregtigheid te laat skiet het dalk nou nie Johan dood gemaak nie, maar dit het ons vriendskap dood gemaak.

Ook in St5 het ek ‘n uitval gehad met een van my ander vriende, Jacques Kruger. Ek kan nie onthou waaroor ons aan die stry geraak het nie, maar dit het vinnig geëskaleer in baie groot geveg. Al wat ek kan onthou is dat ek reg was en hy verkeerd was. En dit my so gepla het dat hy nie kon erken ek was reg en hy verkeerd. Ek het toe gevoel dit was my verantwoordelikheid om vir hom uit te wys dat iemand wat lieg nie hemel toe sal kan gaan nie, maar hel toe. Hierdie waarheid het hy nie baie goed geneem nie, en vir my gesê dit is ek wat hel toe sal gaan. Hierdie het my net verder opgewen want duidelik is ek die een met die verhouding met die Here. Ek gaan hemel toe en hy hel toe. So het ons vir meer as 5minute vir mekaar gesê, “Nee, jy gaan hel toe.” “Nee, jy”, “Jy!”

Ek het selfs gebid vir die Here om Jacques se oë oop te maak tot die feit dat hy hel toe gaan en ek hemel toe. Ek het toe agter gekom ek nie die argument gaan kan wen nie, en het hom maar net met die laaste bietjie waarheid gelos. “Wel as jy eendag doodgaan sal jy sien ek was reg en jy verkeerd.”

My verantwoordelikheidsgevoel om leuenaars te wys hulle gaan hel toe, het dalk nou nie Jacques hel toe gestuur nie, maar dit het ons vriendskap vernietig.

Op hoërskool het my verantwoordelikheidsgevoel net al hoe sterker en sterker gegroei. Seker omdat die mense rondom my gehoer en rumoer het. My absolute beste vriend vir meer as 4 jaar, Danie Prinsloo, het in St9 besluit om nuwe vriende te kry. Alhoewel ek nie presies geweet het wat hierdie nuwe vriende van hom alles gedoen het nie, was ek seker dit was alles sedelike dinge. Na my mening het Danie nie net sy rug gedraai op my nie, maar ook op God. (Want Jesus lewe tog mos in my.)

Hierdie verwerping en sondige gedrag het vir my geen ander opsie gegee nie, behalwe om Danie soos ʼn melaatse te behandel. Dit was my verantwoordelikheid om vir hom duidelik te maak dat as hy nie glo soos ek glo en dinge doen soos ek dit doen nie, is daar geen vriendskap nie. Vir ons hele Matriek jaar het ek hom geïgnoreer. Nie vir hom gekyk nie, nie met hom gepraat nie, nie eers sy bestaan erken nie.

My verantwoordelikheidsgevoel om my beste vriend te wys op sy “sondige” dade, het toe nou nie Danie gebring tot inkeer nie, maar het ons vriendskap beëindig.

In my Matriek jaar het ek my preek stem gevind. Ek het nie net met ‘n Bybel onder my arm geloop nie, maar met die Woord op my spacecase. My spacecase was daardie met ‘n deurskynende deksels, sodat jy prentjies en foto’s kon in sit. Daar was hierdie een spesifieke ou in my klas, Johan Kogh. Volgens my ‘n baie duidelike verlore seun. Hy het altyd ‘n gewoonte gehad om verby my tafel te loop en my nuutste prentjies en foto’s op my spacecase te kyk. Dit het swaar op my skouers gerus om hom uit te wys op sy “verlore” status. By die huis print ek my eerste preek uit en sit dit op my kansel (spacecase).

1 Korintiërs 6:9-10

 Or do you not know that wrongdoers will not inherit the kingdom of God? Do not be deceived:Neither the sexually immoral nor idolaters nor adulterers nor men who have sex with men nor thieves nor the greedy nor drunkards nor slanderers nor swindlers will inherit the kingdom of God.”

(Ek het die woord drunkards in mooi groot font en bold gemaak net, om seker te maak niks word gemis nie.)

Nes ek dit beplan het, (of soos die Here dit gelei het) sit ek eerste, spacecase uit gehaal en op die tafel geplaas. Johan stap in en soos gewoonte hou stil by my tafel en draai my spacecase om en lees wat daarop staan. Ek kan nie begin om die satisfaksie te beskryf wat ek in daardie oomblik gevoel het soos wat hy die waarheid om my spacecase lees. Ek het gevoel hoe die Here so trots is om my dat ek nie skaam is om Sy boodskap te versprei nie.

Nadat hy dit gelees het, het hy my in my oë gekyk, die spacecase terug gedraai en sy skouers opgetrek. In daardie oomblik het ek die grootste openbaring ontvang van my lewe. Een wat ek nie daardie dag ten volle sou kon inneem nie, maar een wat tot vandag toe nog in my hart werk.

Ek kan nie beskryf wat ek raak gesien het in Johan se oë nie, maar al wat ek kan onthou is die geweldige skaam gevoel wat oor my gespoel het. Skaam vir wat ek gedoen het.

My verantwoordelikheidsgevoel om Johan op sy dronkenskap uit te wys, het nou nie hom gehelp om minder te drink nie, maar dit het ‘n potensiële vriendskap gestop.

 

As ek nou daaroor terug dink kom ek agter ek was verantwoordelik teenoor die verkeerde persoon. Ek het geglo dit was my verantwoordelikheid teenoor God om mense na Hom te lei. Maar hoe ek die Woord en Evangelie nou verstaan kom ek agter dat my verantwoordelikheid is teenoor my naaste om God aan hulle te openbaar.

Godsdiens, (altans die reëls daarvan) het geen effek buite of sonder ‘n verhouding nie. Dit wat God vir ons het, dit wat Hy vir ons vra om vir mekaar te gee, is onvoorwaardelike liefde en respek wat in vriendskap manifisteer. Ek was nie lief vir hierdie mense vir wie ek voor gepreek het nie. Ek was nie lief vir die mense wie ek in die hemel wou kry nie. Ek was lief vir die idee om God se werker te wees. Ek was lief vir hoe dit my laat voel het.

Om waarlik lief te wees vir iemand is nie om hulle op hulle foute uit te wys nie, maar om daar by hulle te wees, ten spyte van hulle foute.

So aan Johan Fourie, Jacques Kruger, Danie Prinsloo en Johan Kogh, ek is jammer ek het julle mislei deur om te laat lyk asof genade en liefde verdien moet word. Eks jammer ek het julle mislei deur om vir julle te preek en nie julle te bevriend nie. Eks jammer ek het julle mislei dat ek die waarheid het en julle kortskiet.

Maar dankie vir julle wat deur al my hoogmoed gesuffer het, om aan my te openbaar die belangrikste waarheid: Vriendskap. Liefde. Genade.

 

“Nou wys ek julle wat nog die allerbeste is: Al praat ek die tale van mense en engele, maar ek het geen liefde nie, het ek ‘n stuk klinkende metaal, ‘n galmende simbaal geword.

Al het ek die gawe van profesie en ken ek al die geheimenisse en besit ek al die kennis, en al het ek al die geloof om berge te versit, maar ek het geen liefde nie, dan is ek niks.

Al deel ek al wat ek het aan ander uit, en al gee ek my liggaam prys om my daarop te kan beroem, maar ek het geen liefde nie, baat dit my niks.”1 Korintiërs 13:1-3

Kinders by Dosyne

Opvoedkundige komedie deur Timothy Kieswetter

WellnessseX

Understanding, Acceptance and Management of our sexual wellbeing

goeienuusloli

Ek deel myne...kom deel joune!

tamatieland

'n paar gedagtes

Binne die Glashuis

Die binne na buite weerspieëling van my gevoelens, gedagtes en drome oor Gesonde Seks

Timothy Kieswetter's Blog oor Gesonde Seksualiteit

Om 'n gesonde gesindheid rondom ons seksualiteit te ontwikkel.

%d bloggers like this: